पाल्पा,चैत २०
कच्चा पदार्थ थाकलबाट बनेका आधुनिक हस्तकला तथा उपहारजन्य सामग्री निर्माणसम्बन्धि तालिमको मंगलवार तिनाउको नुवाकोटमा प्रमाणपत्र वितरण तथा समापन कार्यक्रम सम्पन्न भयो ।

कार्यक्रमका प्रमुख अतिथि सामुदायिक वन समन्वय समिति,तिनाउका अध्यक्ष दलबहादुर गुरुङले स्थानीय सामुदायिक वनहरुमा पाइने थाकलबाट बन्न सक्ने झोला, टोपी,पर्स र चप्पल बनाएर स्थानीय,राष्ट्रिय एवम् अन्तर्राष्ट्रिय बजारमा बजारीकरण गर्न सकिने भएको हुँदा आर्थिक समृद्धिका लागि तालिम प्राप्त ब्यक्तिहरु कर्मशील भएर लाग्नुपर्ने बताउनुभयो । 

स्थानीय समूहका उपभोक्ताहरुले थाकलको सहि सदुपयोग गरी सिकेको ज्ञान,सीप र क्षमता प्रयोग गरेर मनग्य आर्जन गर्न सकिने बताउनुभयो  । तालिमको भरमग्दुर प्रयोग गर्न सकेमा बजारीकरणका लागि कुनै कठिनाई नहुने समेत उहाकोे भनाई थियो ।

महिना दिनसम्म सञ्चालित उक्त तालिमका लागि थप पुनर्ताजगी तालिमको समेत प्रवन्ध गर्न सकिने प्रमुख अतिथि गुरुङले आशवासन दिनुभयो । तालिममा सहभागी डेढ दर्जन महिलाहरुलाई उहाँले प्रमाण पत्र समेत वितरण गर्नुभएको थियो । 

विशिष्ट अतिथि समन्वय समितिका सल्लाहकार राजेश श्रेष्ठले थाकलबाट बन्ने सामानहरुलाई देश,विदेशसम्म पुराउन समूहले पहल गर्नुपर्नमा जोड दिनुभयो । उत्पादनमात्र ठूला कुरो होइन ,बजारीकरण महत्त्वपूर्ण कुरा भएको उहाँले जानकारी गराउनुभयो । 

तालिममा प्राविधिक सहयोगीका रुपमा ओम राजश्री मल्टी एग्रो प्रालिका प्रोप्राईटर युवराज गैरेले अन्तर्राष्ट्रिय वजारमा बिक्रीवितरण गर्नुपर्ने भएकोले वस्तु उत्पादनमा फिनिसिङ्ग हुनुपर्ने,आफूले गर्न खोजेको र गरिने काममा बढी सकारात्मक हुनुपर्ने भएको बताउनुभयो । 

सिकारुले बनाएका उत्पादनहरु आफूले खरिद गर्ने र राष्ट्रिय तथा अन्तर्राष्ट्रिय बजारमा बजारीकरण गर्ने बताउनुभयो । सहयोगी प्रशिक्षकका रुपमा समेत आफ्नो कम्पनीले सिकारुहरुलाई अवसर दिने बताउनुभयो । तालिममा तिनाउ सब डिभिजन वन कार्यालयका फोरेष्टर नारायणप्रसाद घिमिरे,सहभागीहरुका तर्फबाट रुपमाया थापा,सावित्रा गुरुङले एक महिने तालिम बढी नै प्रभावकारी रहेको बताउनुभयो ।

अतिथिहरुले तालिमबाट सिकेका सीपलाई आर्थिक उपार्जनसँग जोडिने उल्लेख गर्नुभयो । तालिममा आर्थिक सहयोग डिभिजन वन कार्यालय,पाल्पाले र संयोजन सामुदायिक वन समन्वय समिति तिनाउ,पाल्पाले गरेको थियो । तालिममा प्रमुख प्रशिक्षकका रुपमा शान्ति थापाले सहजीकरण गर्नुभएको थियो । 

तालिम समापन कार्यक्रममा स्वागत बेवरेचिउरी सावउसका उपाध्यक्ष दिनेश थापा,सञ्चालन सचिव हरिकला कुमाल र अध्यक्षता समूहका अध्यक्ष जुद्वबहादुर थापाले गर्नुभएको थियो ।