बुटवल,माघ २९
लुम्बिनी प्रदेश गृह मन्त्री सन्तोष पाण्डेय सहकारी बेथिति रोक्नको लागि सबैले सहयोग गर्नुपर्ने बताउनुभएको छ ।
उहाँले सहकारीको मूल सिद्धान्त भन्दा बाहिर जाँदा सहकारीमा समस्या देखिएको भन्दै बेथिति गर्नेहरू जो भए पनि कानुनी दायरमा सरकारले ल्याउने बताउनुभयो ।
रुपन्देही बचत तथा क्रृण सहकारी सङ्घको १८ औ स्थापना दिवसको अवसरमा आज सोमवार बुटवलमा आयोजित मूल समारोहमा बोल्दै मन्त्री पाण्डेयले लुम्बिनी प्रदेशमा देखिएका सहकारीका समस्या समाधान गर्नको लागि सरकार तयार रहेको बताउनुभयो ।
उहाँले सहकारीले आर्थिक क्षेत्रमा ठुलो योगदान दिएको स्मरण गर्दै पछिल्लो समय केही सहकारीहरूमा देखिएको कारणले समग्र सहकारी क्षेत्र प्रति शङ्का उत्पन्न भएकाले त्यो हटाउनको लागि सहकारीका अभियान्यताहरुले जोड दिनुपर्ने बताउनुभयो । उहाँले सहकारीमा गलत गर्नेलाई कानुन अनुसार कसर बाँकी नराख्ने बताउनुभयो ।
कार्यक्रममा बचत तथा क्रृण सहकारी सङ्घ नेपालका अध्यक्ष चन्द्र ढकालले अहिले सहकारीहरूको डुबेको क्रृण उठाउनु नै मुख्य चुनौती रहेको बताउँदै देशका कुनै पनि सहकारीले सञ्चालकले गलत गर्ने छुट नभएको बताउनुभयो । उहाँले अहिले केही गलत मनसायमा क्रृण र सञ्चालकहरू भएको कारणले यस्तो अवस्था आए पनि त्यसलाई बिस्तारै सही ठाउँमा ल्याउने बताउनुभयो ।
उहाँले सहकारीमा सुशासन कायम गर्नको लागि आफूहरू लागिरहेको बताउनुभयो ।
कार्यक्रमका सहकारी सङ्घ लुम्बिनी प्रदेश अध्यक्ष कृष्ण प्रसाद नेपाल , राष्ट्रिय सहकारी बोर्डका कार्यकारी सदस्य सदीन्प सापकोटा सहकारी अभियन्ता भीम तुलाचन, जिल्ला बचत तथा क्रृण सहकारी सङ्घका अध्यक्ष वसन्त ढकाल नेपाल पत्रकार महासङ्घ रुपन्देहीका अध्यक्ष रामराज पोखरेल ,पत्रकार दामोदर खनाल , जिल्ला सचिव बाबुराम बन्जाडे लगायत बोल्दै सहकारी मर्म भन्दा बाहिर कोही पनि जान नहुने बताउनुभएको थियो ।
